VAWC SYMPOSUIM, ISINAGAWA SA ASINGAN BILANG HAKBANG KONTRA KARAHASAN SA KABABAIHAN AT KABATAAN

Sa layuning palakasin ang kaalaman, magbigay ng suporta sa mga biktima, at itulak ang konkretong aksyon laban sa lahat ng anyo ng karahasan, matagumpay na isinagawa ang isang symposium hinggil sa Violence Against Women and Children (VAWC) sa bayan ng Asingan.

Ang naturang pagtitipon ay dinaluhan ng mga Barangay Officials, Barangay Appointed Officials, Daycare Workers, Municipal Employees, mga kinatawan mula sa Civil Society Organizations (CSOs), Kapulisan, at iba pang miyembro ng komunidad.

Sa kanyang mensahe, Mayor Carlos Lopez Jr. ay nagbigay-diin sa kahalagahan ng pagtutulungan ng bawat sektor ng lipunan upang tuldukan ang anumang uri ng karahasan laban sa kababaihan at mga bata.

Tampok sa symposium ang mga lecture, open forum, at mga pagsasanay ukol sa wastong paghawak ng mga VAWC cases, mga serbisyong maaaring ibigay sa mga biktima, at kung paano makikilahok ang bawat isa sa pagpapalaganap ng isang ligtas at makataong pamumuhay para sa lahat.

Isa sa mga pangunahing tagapagsalita si Atty. Stephanie Joy Rolusta-Valdez, na nagbigay-linaw sa mga umiiral na batas gaya ng Republic Act 9262 o ang Anti-Violence Against Women and Their Children Act of 2004. Ipinaliwanag din niya ang mga legal na hakbang at mga karagdagang proteksyong maaaring asahan ng mga biktima, maging sa loob ng tahanan, paaralan, at sa lipunang kanilang ginagalawan.

Nagpaabot rin ng mensahe ng suporta sina Vice Mayor Heidee Chua, Committee Chairman on Social Welfare Councilor Athena Ira Chua, at Municipal Social Welfare Officer Teresa Mamalio, na pawang aktibong katuwang sa mga programang pangkababaihan at pangkabataan sa bayan.

Sa pagtatapos ng symposium, nanawagan ang mga tagapagtaguyod ng programa ng mas malawak na edukasyon ukol sa VAWC, mas mabilis na pagtugon sa mga kaso, at mahigpit na pagpapatupad ng mga batas upang wakasan na ang karahasang nararanasan ng maraming kababaihan at kabataan sa bansa.