Sa gitna ng patuloy na hamon ng kawalan ng trabaho sa bansa, dumarami ang mga Pilipinong naghahanap ng paraan upang magkaroon ng matatag na kabuhayan.

Isa sa nakikitang solusyon ang pagkuha ng mga kasanayang teknikal—mga kakayahang maaaring magbukas ng oportunidad sa trabaho o magsilbing puhunan sa sariling hanapbuhay.

Ayon sa mga eksperto, mahalaga ang mga programang tulad nito upang mapalawak ang kakayahan ng mga manggagawa at matugunan ang pangangailangan sa iba’t ibang industriya.

Kaugnay nito, magbubukas ng mga slot para sa iskolarship ang TESDA LMMSAT (Luciano Millan Memorial School of Arts and Trades) para sa iba’t ibang kursong teknikal at bokasyonal.

Kabilang sa mga kursong iaalok ang Construction Painting NC II, Shielded Metal Arc Welding NC II, PV Systems Installation NC II, Trainers Methodology Level I, Electronic Products Assembly and Servicing NC II, Electrical Installation and Maintenance NC II, Driving NC II, Bread and Pastry Production NC II, at Events Management Services NC III.

Ayon sa TESDA LMMSAT, libre ang pagsasanay at pagsusulit para sa National Competency Certification para sa mga kwalipikadong aplikante. Magkakaloob din ng Training Support Fund na nagkakahalaga ng P160 kada araw.

Bukás ito para sa mga walang trabaho at kulang sa hanapbuhay na hindi bababa sa 18 taong gulang sa pagtatapos ng pagsasanay.

Kinakailangan magsumite ng photocopy ng birth certificate at alinman sa Form 137, Form 138, o opisyal na transcript of record.

Para sa karagdagang impormasyon at aplikasyon, maaaring magtungo sa TESDA–LMMSAT na matatagpuan sa Barangay Poblacion West. Maaari ring makipag-ugnayan sa numerong 0910 091 3008 o sa email na lmmsat@tesda.gov.ph