Sa kabila ng malakas na buhos ng ulan noong Biyernes, Oktubre 3, 2025, hindi napigil ang pagkinang ng sining at talento ng mga Asinganian sa makulay na pagdiriwang ng Creative Industries Day na ginanap sa Mayor Francisco A. Sapigao Sr. Memorial Sports and Cultural Center.
Itinampok sa programa ang disenyo at dekorasyon ng Palma Royale Styles ni Arturo Palma, habang ipinamalas naman ng Arby Baquirin Atelier ni Arby Tanguan Baquirin, Imaje in Style ni Lervin Manglapuz, AE Make Up Artist and Boutique ni Arje F. Esteban, at Gawang Juanita ni Joanne Cabanilla ang iba’t ibang mukha ng gawang Asingan. Isinabuhay ng mga designer ang makabagong pananamit—mapangahas, malikhain, at may diwa ng pagka-Pilipino.
Lalong nagbigay-ningning sa gabi ang pagrampa nina Vice Mayor Heidee Chua, Councilor Athena Ira Chua, at Sheryl Lasmarinas-Lopez, maybahay ni Mayor Carlos Lopez Jr., na nagsilbing huwaran at inspirasyon sa mga manonood at kalahok.
Sa kanyang talumpati, ipinahayag ni Mrs. Lopez ang paghanga sa talento ng mga lokal na fashion designer at creatives. “Ang talento ay kayamanang dapat linangin, ibahagi, at huwag ikahiya,” aniya, sabay hikayat sa kabataan na mangarap nang malaki at huwag matakot sumubok.
Ibinahagi rin niya na matagal na niyang mithiin na mabigyang-pagkilala ang mga malikhaing Asinganian, at lubos ang kanyang pasasalamat sa lahat ng nagbigay-daan upang maisakatuparan ang kaganapang ito.
Nagpahayag din ng suporta sina Mayor Carlos Lopez Jr., Vice Mayor Chua, at Councilor Chua, na kapwa naniniwala sa kakayahan ng lokal na sining na makipagsabayan sa mas malaking entablado, lokal man o pandaigdig.
Sa pagtatapos ng programa, umalis ang mga dumalo na may dalang inspirasyon at pag-asa—patunay na ang “Likhang Lokal, Gawang Asingan” ay hindi lamang isang tema, kundi isang panata na ipagmalaki ang sariling atin.
Nagbigay rin ng mensahe si Tourism Officer Michael Soliven, na nagpaabot ng kanyang pasasalamat at pagpupugay sa lahat ng lumahok at sumuporta sa tagumpay ng pagdiriwang.
Isang gabi ng sining, isang selebrasyon ng galing, at isang tagumpay para sa bayan.
